CHI E' 'NU PAJISI Chi e 'nu pajisi? 'Nu mundu chi parra 'na lingua diverza; du' casi, 'na chiazza, 'na chiesi e fora pajisi Magari 'na cerza, 'nu muru, 'nu ponti... (duva l'acqua chi passa sapa ca 'on po' cchiù tornara e sinda vada ciangendu pemmu s'annega a ru mara!). Chi e 'nu pajisi? U celu cchiù bellu du mundu, 'na terra chi è sempa 'a tua, na casa, 'na vuci, 'nu hocu... (chi u hriddu 'e ]ennaru passandu 'na notta astutau). Chi è 'nu pajisi? U mundu cchiù bellu si l'hai, ‘na pena a ru cora c'on passa si poi tinda vai!

SAN SOSTI A ri hardi du Zuccu, ammenzu du' hiumari, si riposa San Sosti, tra orti e castagnari. A sinistra ava Davuli, a destra Sant’Andria e ‘mpacci al1'occhi u mara: è chista a terra mia.

NA TARGA A ru ponti du Riaci, supa 'na targa é 'a scritta "San Sostene". Cu passa 'o ra léia; cu' 'on esta sa 'nsonna.

RICORDATI Quandu torni a San Sosti, tu chi bai duva 'na vota fu u pajisi meu, ricòrdati ‘na cosa chi non sai, ca si on t' incriscia mo' ta cuntu eu. Appena si' a Bonia, vidi u pajisi e arrivi viatu a ra Misericordi. Ma quandu, doppu Stella, i primi casi ti sbattanu 'ntra l'occhi, hai ‘u ti ricordi du tempu chi passau; ca si fu pocu e gioventù e da tua, ridi e non ciangi, ma si a ra casa tua astutaru u hocu 'a strata chi facisti è megghiu ‘u cangi. Comu hannu i linduni a ra marina quandu 'a muntagna è nigra e u ventu caccia ‘a negghia 'ntri vadruni e da matina grida 'a morvizza chi ti para paccia.

PANORAMA Da praia mi vidia tuttu Portedra, i chiani 'e Luppinati e ra Divisa, ma n'occhiu sinda jia a ra Crucicedra e ad Alaca chi scinda tutta 'mpisa. Cchiù sutta. Portunovu e ra marina, chi furu 'a terra de l'antichi mei e duva hiura 'a zagara e camina 1' unda chi bitta Saracini e Achei. Mo' sugnu ccà. chiantati i peda 'nterra pe ddommu cchiù mi scippanu ‘e stu mara. Ma u sula chi si ggira 'a via da Serra saluta 'a praia, l'unda e l'arangara.

U JORNU Néscia du mara u sula ch'a San Sosti avvampa viatu i chiani e ri timpuni. U primu chi s'adruma è u Scivuluni, poi Colasirti e tutti l'attri costi, Para 'na hesta ed è sulu 'nu jornu, chi sinda vacia 'a sira all'ammucciuni e quasi quasi mancu tind' adduni ca t'addormenti pe' 1'appressu jornu. Ma quandu u celu è nignu a Santuvitu o ca hiùhhia u levanti a ra marina, hùmanu i ciaramidi da matina, e ad ogni focularu è 'nu cumbitu. Chistu è San Sosti chi fu d'i Gualtieri, Salvia, Politi, Costa e Cumberzanu, e duva u tempu passa chianu chianu comu 1' acqua chi cada d'i gutteri.

SANTA DOMINICA Santa Dominica, chiesulidra antica, attaccata a ra casa 'e Cumberzanu, ma' réstanu du' petri ed a ru' chianu ‘on senti mancu cchiù 'na vuci amica "A Santa sa portaru a ru pajisi" - mi dissa, ca' u hermai', nu pajisanu - "drà ‘on li manca curatu e sacrestanu e na missa cantata ad ogni misi. O Sansostari, ‘sta cundanna a morta é 'na trista sentenza a ru pajisi, ca si 'na santa mot nda hicia i spisi u mundu è bbecchiu com'è bbecchia a sorta. Si'e spiritu ritorni tu a ri chiani chi furu i toi per i silenzi antichi, o Santa, 'u resta ccà d' arcedri e pichi cantu serenu e pascoli luntani. 'N'occhiata 'ngiru e 'a machina partiu sagghiendu a rumbi u pettu da Divisa. Poi chianu chianu, quasi' e celu 'mpisa, a vuci da hiumara mi sturdìu.

Poesie di Antonio Ranieri tratte dal libro "CHI E' 'NU PAJISI"